Siareir@s Galeg@s ante o início do Campionato do Mundo de Alemanha

Junho de 2006

Hoje começa a XVIII ediçom do Campionato do Mundo da FIFA, sem dúvida o torneio mais importante deste desporto a nível de selecçons nacionais, que se vai celebrar na Alemanha, e no qual competirám selecçons dos cinco continentes.

Mas nom todas as naçons podem optar à participaçom neste Campionato do Mundo. Na Galiza sabemo-lo bem. A nossa selecçom e o nosso País nom podem optar a participar nela, mas nom por razons desportivas, senom por causa da antidemocrática legislaçom espanhola nesta matéria que impede que, frente à reclamaçom de selecçons oficiais por parte de importantes sectores da nossa sociedade, como se demonstrou em Compostela o 29 de Dezembro passado, nom exista mais selecçom do que a espanhola.

Siareir@s Galeg@s aproveitamos esta nova cita para continuar a defender o direito da Galiza a ter selecçons próprias a nível oficial e a luitar contra os vetos e imposiçons aos nossos direitos nacionais no terreno desportivo. Aliás, afirmamos que a selecçom espanhola nom nos representa, que nom é a nossa selecçom nem nos identificamos com ela. O Estado espanhol, através das instituiçons e os meios de (des)informaçom tenta fomentar o espanholismo arredor da selecçom espanhola de futebol. Mas @s galeg@s sabemos que a nossa selecçom é a galega e a nossa naçom a Galiza.

Além disto, também queremos recordar à Junta e à Secretaria Geral para o Desporto que devem seguir dando passos para que a selecçom galega de futebol, junto com as dos demais desportos, seja umha realidade, e o contexto do Campionato do Mundo é umha boa oportunidade para demonstrar que as instituiçons realmente caminham face esse objectivo. Nom queremos que fique num jogo ao ano de carácter amigável e nom oficial. Achamos que agora só resta avançar, para que na próxima Taça do Mundo, na África do Sul, a Galiza também poda estar presente.